என்னதான் நடக்கும் நடக்கட்டுமே !!

கோவில்களும் தர்ம சாஸ்திரங்களும் வேதங்களும் திருவிழாக்களும் பஞ்சமில்லாமல் ஊரெங்கும் நிரம்பி கிடக்கின்ற நமது இந்திய தேசம், கோவில்கள் தோறும் வழிபாடுகளுக்கு சிறிதும் பங்கம் ஏற்படாமல் இருக்க கட்சிகள் வேறு போட்டி போட்டுக்கொண்டு வல்லூறுகளாய் சுற்றிக்கொண்டிருக்கும் தேசம் நமது இந்திய தேசம். அதே தேசத்தில் இன்றைக்கு ஊழலுக்காக வலிமையான சட்டம் இயற்றப்பட வேண்டும் என்கின்ற போராட்டம், இதை ஆதரிக்கும் கூட்டத்திற்கு பஞ்சமில்லை. இதென்ன கூத்து?



'படிப்பது ராமாயணம் இடிப்பது சிவன் கோவிலா?' கோவில் உண்டியல்களில் நிரம்பி வழிகின்ற கருப்புப்பணம், கணக்கில் வராத பொன் ஆபரணங்கள், கடவுளுக்கே லஞ்சம், கடவுள் மன்னிப்பாரா? லஞ்சம் வாங்கிய பணத்தை கோவில் கும்பாபிஷேகத்திற்கு, கோவில் திருவிழாக்களுக்கு, நேர்த்தி கடன்களுக்கும் செலவிட்டால் கடவுள் ஏற்றுக்கொள்வாரா? ஏற்றுக்கொள்வார் என்போமானால் லஞ்சம் வாங்குவதும் கணக்கில் வராத கருப்புப்பணம் சேர்ப்பதும் பாவமில்லையா? பாவமில்லை என்போமானால் எதற்காக அன்னா ஹசாரேயை ஆதரிக்கும் ஊர்வலங்களும் கோஷங்களுக்கும் ஆதரவு? அல்லது எதற்க்காக ஊழலுக்கு எதிரான லோக்பால் சட்டம்?



சட்டமும் கடவுளைப்போன்றதுதானே? தவறுகளையும் மீறுதல்களையும் பொருத்துக் கொள்வதற்காக அல்லவே? சட்டத்தை மீறி இருப்பினும் கடவுளின் பார்வைக்கு தப்ப முடியாதல்லவா? இவ்வாறிருக்க ஊழலும் லஞ்சமும் கருப்புப்பணமும் எதனால் நமது தேசத்தில் அதிகமாயிற்று? மனிதனுக்கு கடவுளையும் சட்டத்தையும் விட பண ஆசை, இல்லை இல்லை பேராசை காரணம் என்று சொல்வோமா? அப்படியானால் கடவுளை வணங்குதல் என்பது கடமையா அல்லது நாடகமா?



'எதையும் கொண்டு வரவில்லை எதையும் கொண்டு போகபோவதில்லை' என்று வாய் கிழியப் பேசினாலும் தலைமுறைகள் உட்கார்ந்து சாப்பிட சேமித்து வைத்துவிட்டு போகவேண்டும் என்கின்ற பேராசையை மேற்கொள்ள சம்மதமில்லை என்பதுதான் இதன் பொருளா? அல்லது ஊருக்கு உபதேசமா? அன்னா ஹசாரேயின் லோக்பால் மசோதாவை ஆதரிப்பவர்கள் எல்லோருமே தங்களது சொந்த வாழ்க்கையில் கருப்புப்பணம் வாங்கியதோ ஊழல் செய்வதில் ஈடுபட்டதோ இல்லையா? யார் தான் ஊழலை ஆதரிக்கபோகின்றார்கள்? ஊழலை ஆதரிப்பவர்களாக இருந்தாலும் அதை வெளிப்படையாக காண்பித்துக் கொள்வார்களா? உள்ளொன்றும் புறமொன்றும் என்பதுதான் பழகிப்போனதாயிற்றே!!



உண்மையில் பார்க்கப்போனால் ஏழை எளிய மக்கள், மாதாந்திர சம்பளம் வாங்கி பற்றாக்குறையோடு வாழ்க்கையின் போராட்டத்தில் சிக்கித் தவிப்போரைத் தவிர ஊழலுக்கு எதிராக உண்மை குரல் கொடுப்பவர்கள் வேறு யாராக இருக்க முடியும்?



@@@@@@

அன்பு சகோதரி கனிமொழிக்கு - கடிதம்

வாக்குப்பதிவு இயந்திரத்தில் நேர்மையாக வாக்குகள் கிடைக்காது என்று போராடியவர்கள் பெருவாரியான வாக்குகளைப்பெற்று ஆட்ச்சியை கைப்பற்றியபோது மட்டும் இயந்திரம் நேர்மையான வாக்குப்பதிவை கொடுத்ததாக எண்ணி 'ஜனநாயகத்தின் வெற்றி' என்று சொல்லிக்கொள்வது 'எதையோ' நமக்கு சொல்லாமல் சொல்கிறதே?



கலைஞர் தொலைக்காட்சியையும் கலைஞரது குடும்ப ஆட்சியையும் அவதூறு பேசுபவர்களுக்கு இது ஒரு பொற்காலம், போதாக்குறைக்கு தவிச்ச வாய்க்கு அவல் கனிமொழியின் கைது. தி மு காவையும் கலைஞர் குடும்பத்தையும் வசைபாடுவதற்கு இதைவிட்டால் வேறு ஒரு சந்தர்ப்பம் கிடைக்குமா? [கால அவகாசம் ஐந்து வருடம் போதாதா என்ன?].



திண்ணை பேச்சு, ஊர் வம்பு, டீக்கடை வம்பு, என்ற வம்பு பேச்சுகளெல்லாம் இப்போது கூகுள் கொடுத்த (வரமோ சாபமோ) இணையதள திண்ணை என்கின்ற வலைப்பூவில் வம்பு பேச்சில் சிக்கி கனிமொழி, தி மு க, காங்கரஸ், அன்னா அசாரே, ஊழல் என்று புது பெயர் சூட்டிக்கொண்டு வலம் வந்து கொண்டிருப்பது இப்போதைய டிரண்டோ?



****************************************************



அன்புள்ள சகோதரி கனிமொழிக்கு,



நீங்கள் நலமா நாங்கள் இங்கு நலம் என்று கடிதங்களில் விசாரிக்கும் முறைப்படி கடிதத்தை துவக்குவதற்கு எனக்கும் ஆசைதான், ஆனால் அது பொய்யானதாகத்தான் இருக்கும், ஏனென்றால் அங்கு (சிறையில்) உள்ள நீங்கள் எப்படி நலமாக இருக்க முடியும், அதே போன்று சிறைக்கு வெளியே இருக்கும் நாங்கள் எல்லாரும் நலமென்று எப்படி பீத்திக்கொள்ள முடியும். இரண்டுமே இல்லாத ஒன்று, யாருடைய நலமும் தற்போது நிஜமானது இல்லை என்பதால் கடிதத்தை நல விசாரிப்புகள் இல்லாமலேயே துவங்க வேண்டுமென்று நினைக்கிறன்.



சகோதரி, சிறைவாசத்தில் தங்களுக்கு அனுபவம் இல்லை, அதிலும் இன்னும் நிரூபிக்கப்படாத குற்றத்திற்காக சிறைவாசம் செய்யும் உங்களைப் போன்ற பலரது நிலையை தற்போது நீங்களும் உணர்ந்திருப்பீர்கள், முற்றிலும் வித்தியாசமான நிலைமையில் வாழ்ந்து கொண்டிருக்கும் பலரை சிறையினுள் நீங்கள் சந்திக்க கூடும், வித்தியாசமான அந்த உலகத்தை, அந்த அனுபவத்தைப் பற்றி வேறு ஒருவர் மூலம் நாம் அறிவதைவிட அதிலே வாழ்ந்து அறிவதென்பது நிச்சயம் வேறாகத்தான் இருக்கும். அவற்றை தங்களது அழகிய உரை நடைகளில் எழுத்துக்களாக்கினால் எங்களைப் போன்றவர்களும் அறிந்து கொள்ள முடியும் என்று நான் நினைகிறேன்.



சிறைக்கு செல்வதில் எத்தனையோ காரணங்கள் உண்டு கோவலனை கூட சிலம்பு திருடிய கள்வன் என சிறைவைத்தான் கோப்பெரும் சோழன், பனைமரத்தடியில் இருந்து குடிப்பதெல்லாம் கள்ளாகிவிடுமா, இந்த உலகத்தில் பல சமயங்களில் பால் கள்ளென்றும் சொல்லப்படுவதுண்டு. மனம் தளராமல் காத்திருங்கள், உண்மை என்பதை யாராலும் மூடி வைக்க இயலாது, நிச்சயம் வெளிவரும். அற்ப சந்தோஷத்திற்காக நேர்மையற்ற காரியங்கள் பல செய்வதில் பலருக்கு ஆர்வம் அதிகம். அதை பொருட்படுத்துவது அவசியமற்றது.



மனம் நிம்மதியாக இருக்க எவற்றையெல்லாம் சிந்திக்க வேண்டுமோ அவைகளை மட்டும் சிந்தியுங்கள், நடப்பது எல்லாம் நன்மையாய் நடக்கும் என்றே நம்பிக்கையுடன் இருங்கள். 'சொல்வது எளிது' என்பது எனக்கு தெரியும் ஆனால் சகோதரி நான் 'அற்ற குளத்து அருநீர் பறவை போல' என்றிருக்க மனம் கேட்கவில்லை என்பதால் இவற்றையெல்லாம் சொல்லுகிறேன். மிகவும் முக்கியமாக அடிக்கடி உங்களுக்கு பெற்றோரின் நினைவும் மகனின் நினைவும் வந்து துன்புருத்தாமலிராது. வாழ்க்கை என்பது துன்பமும் இன்பமும் கலந்தது என்பார்கள் ஆனால் உண்மையல்ல, கடலளவு துன்பத்தில் கடுகளவு இன்பம்தான் இவ்வுலக வாழ்வில் மனிதனுக்கு கொடுக்கப்பட்டிருக்கின்ற இன்பத்தின் அளவு.



நமக்கு நாம் மட்டுமே பல சமயங்களில் நண்பனும் விரோதியும் என்பது என் கருத்து, கிடைத்திருக்கும் அரிய இந்த சந்தர்ப்பத்தை கைவிடாமல் உங்களை நீங்களே புதிதாக்கிக் கொள்ளுங்கள், வீறு நடை போட்டு பெண் சிங்கமாக வெளியே வாருங்கள் காலம் எல்லாவித மாற்றங்களையும் மாறாமல் எல்லோர்க்கும் கொடுக்கும். வாழ்த்துக்கள்.



உங்கள் அன்பு சகோதரி

ரத்னா

சுதந்திரம் - ஜனநாயகம் ?

விடுமுறைக்குப்பின் பள்ளிக்கூடங்கள் திறந்தால் போதும் ஆரம்பமாகிவிடும் 'படி, ஹோம் வொர்க் எழுது' போன்ற அம்மாவிற்கும் பிள்ளைகளுக்குமான ஒரே மாதிரியான உரையாடல்கள், மாலையில் வீடு திரும்பும் பெற்றோர் அல்லது அப்பாக்களிடமிருந்தும் இதே உரையாடல்களைத்தான் கேட்க முடியும். ஆனால் பள்ளிகள் திறந்தும் படிப்பதற்கு புத்தகமில்லாமல் இருக்கும் பிள்ளைகளிடம் பெற்றோர் இந்த உரையாடல்களை நடத்த இயலாமல் போனது அதிஷ்டவசமானதோ துரதிஷ்டவசமானதோ, தவறாமல் தினச்செய்திகளை படிப்பதும் இன்று ஏதாவது செய்தி கிடைக்குமா என்று பெற்றோருடன் சேர்ந்து கொண்டு பிள்ளைகளும் கண்ணும் கருத்துமாக தொலைக்காட்சி செய்திகளை பார்ப்பதும் கடந்த இருமாத காலமாக வீடு தோறும் நடந்து வந்தது.



அவ்வாறு செய்திகளை கவனித்துக்கொண்டிருந்த பையன் ஒருவன் தான் கண்ட செய்திகளின் அர்த்தம் விளங்காமல் தன் பெற்றோரிடம் இப்படி கேட்டான், எங்களுக்கு புத்தகங்கள் கிடைக்கவில்லை என்பதால் பள்ளிக்கூடங்களில் பாடம் சொல்லி கொடுக்க முடியவில்லை என்பதற்காக கைகளில் பதாதைகளை ஏந்திக்கொண்டு பலர் கோஷமிடுகின்றனர், ஆனால் வங்கிகளில் வேலைபார்ப்பவர்களும், அன்னா ஹசாரே என்பவரும் உண்ணாவிரதம் இருப்பதும் கோஷமிடுவதும் கூட இது போன்ற காரணத்திற்காகத் தானா' என்றான். அவனது பெற்றோர் தங்களுக்கு இயன்ற முறையில் விளக்கமளித்தும் சரியான விடை கிடைக்காமல் தனது பள்ளித்தோழனிடம் இதைப் பற்றி கேட்டான், அவனது பெற்றோர் வங்கியில் பணியாற்றி வந்தனர் என்பதால் தனது பெற்றோரிடம் கேட்டு சரியான பதில் சொல்வதாக சொன்னான்.



அவன் தன் பெற்றோரிடம் சென்று அன்னா ஹசாரேயும் அவரது உடன் கோஷமிடுபவர்களும் வங்கியில் பணி செய்பவர்களைபோல பதாதைகளை ஏந்திகொண்டு கோஷமிடும் காரணம் என்ன என்று கேட்டான். அதற்க்கு அவனது பெற்றோர் அவனிடம் 'எல்லோருமே ஏதாவது கோரிக்கைகளை முன் வைத்துதான் கோஷமிடுகின்றனர்' என்றார்கள். அந்த சிறுவனுக்கு முழுவதுமாக விளங்கவில்லை, ஆனால், தனக்குள் 'ஏதாவது வேண்டும் என்றால் நாமும் உண்ணாவிரதமிருந்து கோஷமிட வேண்டும்' என்ற முடிவிற்கு வந்தான்.



சுதந்திரம் நமக்கு கொடுத்திருக்கும் மாபெரும் வரம் பதாதைகளை ஏந்திக்கொண்டு கோஷமிடுவதும் உண்ணாவிரதமிருப்பதும் என்பது மட்டும் தானோ என்கின்ற கேள்வி எழுகிறது. தங்களது கோரிக்கைகள் நிறைவேற அல்லது தங்களது எதிர்ப்புகளை வெளிப்படுத்த மக்களாட்சியில் மக்களுக்கு கிடைத்திருக்கின்ற இந்த சுதந்திரம் உண்மைதான் என்றாலும் வரம்புகளுக்கும் சட்டதிட்டங்களுக்கும் நாம் கட்டுப்பட்டவர்கள் என்பதையும் அதே ஜனநாயகம் நமக்கு உணர்த்துவதை மறந்துவிடுவது குற்றமாகும், நான் எனது நாட்டில் சுதந்திரமாக வாழவேண்டும் அதே நேரத்தில் ஜனநாயகத்தில் உள்ள அரசியலமைப்பின் சட்டதிட்டங்களையும் கடை பிடித்தாக வேண்டும் அப்படி கடைபிடிக்கத் தவறும்போது குற்றவாளியாக கருதப்படுவதை சுதந்திரத்தால் தடுக்க இயலாது.



எந்த அளவிற்கு சுதந்திரத்தை கொண்டாடுகிறோமோ அதே அளவிற்கு சட்டங்களையும் கடைபிடிக்க வேண்டிய பொறுப்பு ஒவ்வொரு குடிமகனுக்கும் கடமையாகிறது. சட்டத்தையும் ஜனநாயக அரசியலமைப்பையும் அவமதிப்பது எவ்வாறு சுதந்திரமாக கருதப்படும்.

வாழும் வரை போராடு

ஆடின காலும் பாடின வாயும் சும்மா இருக்காது என்பது பழமொழி, அதுபோன்று ஏறக்குறைய நான்கு மாதங்களுக்குப் பின்னர் எழுத்துலகம் என்னை திரும்பவும் தன் பால் இழுத்ததில் எனக்கு ஆச்சரியம் ஒன்றுமில்லை.



தமிழகத்தின் ஆட்சி மாற்றம் ஆட்சிமாறியவுடன் பல காட்சிகள் அவசரகதியில் மாற்றம் அதனால் ஏற்பட்ட ஏகோபித்த மக்கள் ஓலம், என தமிழகம் சந்தித்து வருகின்ற திடுக்கிடும் சம்பவங்கள் போதாது என்று அடுத்த மாநிலத்தில் எடியூரப்பாவின் ஆட்சிக்கு ஏற்பட்ட எதிர்ப்புகள் அவற்றை அவர் சமாளித்து வந்த விதம், ஆளுநரும் முதலமைச்சரும் எலியும் பூனையுமாகி 'மிக்கியும் டோனல்டையும்' நினைவுப்படுத்தி ஒருவழியாக ஏதோ ஒரு சிறிய மாற்றம் ஏற்பட்டிருப்பதும், கேரளாவில் தேர்தலுக்குப் பின்னர் அச்சுதானந்தன் கீழிறக்கப்பட்டு ஒம்மன் சாண்டி பொறுப்பேற்றப் சில மாதங்களிலேயே பத்பநாப கோவிலில் கிடைத்த பொக்கிஷங்களும் அதை தொடர்ந்து அதைப்பற்றிய செய்திகளும், வங்கதேசத்தில் கம்யுனிஸ்டுகளின் இருக்கத்திலிருந்து மீண்ட மாநில ஆட்சியை திரினாமுல் காங்கிரஸ் கைப்பற்றி மம்தா ஆட்சி பொறுப்பை ஏற்றது போன்ற மிகவும் சுவாரஸ்மான பல காட்சிகள் அரங்கேறியிருப்பதுடன் இன்னும் பல சுவாரஸ்ய செய்திகளும் எழுத்துக்கும் கருத்துக்கும் காத்துக் கிடந்தாலும் ஏதோ ஒன்று எனது எழுத்தை சற்றே நிறுத்தியிருந்தது.



சமச்சீர் கல்வி பிரச்சினைக்கு தீர்வு கிடைத்து விட்டதாக நினைத்து சற்றே பெருமூச்சு விட்டால், இல்லை இன்னும் அந்த பிரச்சினையிலிருந்து முழுவதுமாக விடுபட்டபாடில்லை என தெரிவிக்கும் செய்திகள் தொடர்ந்து கொண்டே இருக்க 'பாவம் இந்த வருடத்து மாணவர்களும் ஆசிரியர்களும், அத்துடன் சேர்த்து அவர்களது பெற்றோர்களும்' என ஆதங்கப்பட வைக்கிறது செய்திகள்.



'ஊரு ரெண்டுபட்டா கூத்தாடிக்கு கொண்டாட்டம்' என்பது பழமொழி, செய்திகளைத்தேடி அலைய வேண்டிய வேலையே இல்லாமல் செய்திகள் மிகவும் சூடாகவும் மேலும் மேலும் வந்து குவிந்த வண்ணம் உள்ளது செய்திகள் சேகரிப்பவர்களுக்கு சுறுசுறுப்பை ஏற்ப்படுத்தும். அன்னா அசாரே என்பவர் சமூகநலத்திற்காக பாடுபடுபவராக இருப்பதில் யாருக்கும் பிரச்சினைகள் இருக்காது, அவரை யார் கருவியாக பயன்படுத்துகிறார்கள் என்பதுதான் இன்றைய பிரச்சினைகளுக்குள்ளே முடங்கி கிடக்கும் புதிர்.



அன்னா அசாரேயைப்போல ஒவ்வொருவரும் ஒவ்வொரு பிரச்சினையை கையில் தூக்கிப் பிடித்துக்கொண்டு உண்ணாவிரதம் மேற்கொண்டால் நாட்டின் நிலை என்னாகும், ஊழலை தடுக்க பாடுபடுகிறோம் பேர்வழி என்று சொல்லிக்கொண்டு நாட்டில் உள்ள மக்களுக்குள்ளேயும் கட்சிகளுக்குள்ளேயும் கிளர்ச்சிகளை ஏற்படுத்துவது என்பது எந்த சமூக ஆர்வலர்களும் ஏற்றுக்கொள்ளக் கூடியது இல்லை. அன்னா அசாரேயை கருவியாக்கும் சிலரால் நாட்டில் குழப்பங்களும் கலவரங்களும் ஏற்படுமேத் தவிர ஊழலை ஒழித்துவிட முடியாது.



திருவனந்தபுரம் பத்மநாபர் கோவில் மட்டுமில்லை ஒவ்வொரு கோவிலையும் அக்காலத்து மன்னர்களும் குறுநில மன்னர்களும் தங்களது அளவிற்கு மீறிய சொத்துக்களையும் பொக்கிஷங்களையும் பாதுகாக்குமிடமாக பயன்படுத்தி வந்ததுடன் அந்த பொக்கிஷங்களை திருடினால் தெய்வ குற்றம் ஏற்ப்படும் என்று மக்களிடம் இல்லாத வதந்திகளை பொக்கிஷங்களை பாதுகாக்கின்ற தந்திரமாக புரளி ஏற்ப்படுத்தி வந்தனர். அக்காலத்தில் வங்கிகளும் பொக்கிஷங்களை பாதுகாக்கும் லாக்கர்களும் இல்லை என்பதே இதற்க்கு முதன்மையான காரணம்.



அளவிற்கு அதிகமான நிலங்களை கோவிலுக்கு எழுதி வைப்பதும் வாரிசு இல்லாத சொத்துக்களை கோவிலுக்கு எழுதுவதும் அக்கால முறைகள். கடவுளுக்கு நகைகளும் பொக்கிஷங்களும் அவசியமில்லை, கடவுள்தான் அவற்றை மக்களுக்கு வாரி வழங்க வேண்டுமேத் தவிர மக்கள் கடவுளுக்கு வாரி வழங்க வேண்டிய கஷ்டத்தில் கடவுள் எப்படி இருக்க முடியும். பொக்கிஷ அறைகளைத் திறக்க அரச குடும்பத்தினர் கூறும் காரணங்கள் பழங்கால கதைகள் இந்த காலத்தில் அவதியுறும் கோடானு கோடி மக்களின் துயர் துடைக்க அந்த பொக்கிஷங்களை அரசு ஏற்று நல திட்டங்களை உருவாக்கி நேர்மையான முறையில் பயன்படுத்த வேண்டும்.



புட்டபர்த்தி சாய்பாபாவின் சொத்துக்களுக்கும் இதே கதி உருவாகியிருப்பது ஏழை எளியோரை கோடிக்கோடியாக தன்னுள்ளே வைத்திருக்கும் நமது இந்திய நாட்டில் பொக்கிஷங்களும் பணமும் சாமி என்ற பெயரில் சில இடங்களில் குவிக்கபட்டிருப்பது வேதனை தருவதாக உள்ளது.

GOOD FRIDAY - EASTER

நண்பர் ஒருவர் எனக்கு Happy Good Friday என்று வாழ்த்துக் கூறினார், அவர் ஒரு MBA பட்டதாரி. படித்ததினால் எல்லோருக்கும் எல்லாமே தெரிந்து விடுவதில்லை, பொது அறிவு என்பது உலக நடப்புக்களை அறிகின்ற அறிவு அவசியப்படுகிறது. நமது துறைக்கு அப்பாற்பட்ட செய்திகளையும் அறிந்திருப்பது என்பது எல்லோருக்கும் அவசியம் ஆனால் அவசியமில்லை என்கின்ற எண்ணம் தான் பரவலாக உள்ளது. அதைவிட இன்னும் பெரிய விஷயம் தான் சம்பந்தபட்டிருக்கும் துறையிலேயே அல்லது தான் வணங்கும் மதத்தைப்பற்றியும் தான் வாழ்ந்த வாழுகின்ற ஊரை, இடத்தினை பற்றியோ கூட அறிந்துகொள்வது அவசியம் அற்றதாக கருதும் பலரும் படித்த நபர்களில் அதிகம்.

இதற்க்கு காரணம் என்ன, பணம் சம்பாதிப்பதற்கு மிகவும் முக்கிய கருவியாக கல்வி இன்றைய சூழலில் மிக முக்கிய இடம் பெற்றிருப்பதே. பணம் வாழ்வின் மிக முக்கிய ஆதாரமாக கருதப்படுவதால் அதை அடையும் வழிகளைப்பற்றி அது நன்மையானதோ தீமையானதோ அதைப் பற்றிய உணர்வின்றி பணத்தை அடைகின்ற வழிகளை கண்டுபிடித்து பணம் சேமிக்கும் முறைகளில் வல்லவர்களாக வேண்டும் என்கின்ற உந்துதல் மட்டுமே இன்றைய காலத்தின் முக்கிய பணியாக கருதுகின்றனர்.

இயேசு கிறிஸ்த்து என்பவர் பிறக்கப்போவதையும் அவர் குறிப்பிட்ட காலத்திலே இறக்கப்போவதையும் தீர்க்கதரிசிகள் பல ஆண்டுகளுக்கு முன்பே கூறி இருந்தனர். அதன்படி இயேசு கிறிஸ்த்து பிறந்து முப்பதாண்டுகள் வாழ்ந்து சிலுவையில் கொல்லப்படுகின்றார், சிலுவை என்பது இயேசு கிறிஸ்த்து வாழ்ந்த காலத்தில் இருந்த மரண தண்டனை, திருடர்கள் மற்ற கொலை குற்றங்கள் செய்பவர்களுக்கு அக்காலத்தில் அங்கு இருந்த அதிகபட்ச தண்டனை, இயேசு கிறிஸ்துவின் மீது மத விரோதிகள் நடத்திய கொடுமையின் விளிம்பு இயேசுவை சிலுவையில் கொல்ல ஏற்பாடு ஆகியது, அவரை கொன்ற அந்த நாள் வெள்ளிக்கிழமை அந்நாளை பிற்காலத்தில் Good Friday என்று வழங்கினர். புனித வெள்ளி என்று தமிழிலில் மொழி பெயர்ப்பு செய்யப்பட்டுள்ளது. இயேசுவை கொன்ற நாளை ஏன் Good என்று குறிப்பிட வேண்டும் என்பது பலரது கேள்வியாக இருக்கலாம்,

அவர் இறந்தது மனு குலத்தின் பாவங்களை அகற்ற, அது எப்படி அவர் இறப்பதால் மனுக் குலத்தின் பாவங்கள் அகலும் என்று இன்னுமொரு கேள்வி உருவாகும், ஆதி காலத்தில் விவிலியத்தில் [பைபிள்] உள்ளபடி ஆதாம் ஏவாள் என்பவர்களை ஆண்டவர் படைத்த பின்னர் அவர்களுக்கு கூறப்பட்ட கட்டளை குறிப்பிட்ட ஒரு மரத்தின் கனியை மட்டும் உண்ணக் கூடாது என்பது அப்படி அவர்கள் அதை உண்ணும் நாளில் பாவம் என்பதை அறிய நேரும் அப்போது அவர்கள் சாவார்கள் என்பது. சாத்தான் என்கின்ற பிசாசு நயவஞ்சகம் செய்து பூமியின் முதல் பெண் ஏவாளை தனது பேச்சால் நம்ப வைத்து அந்த பழத்தை உண்ணச் செய்தது, மீதியை பூமியின் முதல் ஆண் ஆதாமிற்கும் கொடுத்து உண்ணச் செய்தது. பாவம் என்பதை அறிந்த இருவரும் ஆண்டவரின் சாபத்திற்குள்ளாக நேர்ந்தது.

இந்த பாவம் தொடர்ந்தது, பல ஆயிரம் ஆண்டுகளாக மனிதர்கள் பூமியில் அதே பாவத்தை தொடர்ந்து செய்து பிள்ளைகளை பெற்று உலகம் முழுவதும் மனித இனம் பெருகியது. ஆதாம் ஏவாளுக்கு முதலில் பிறந்த இரண்டு ஆண் பிள்ளைகளின் மீதும் இந்த பாவம் தொடர்ந்தது, சாபத்தை சாத்தான் என்பவன் வேறு வகையில் பூமியின் மீது பெருகச் செய்கிறான், ஆதாமின் மகன் பூமியின் மண்ணை உழுது விதைத்து பின்னர் அறுவடை செய்த தானியங்களையும் காய் கனிகளையும் ஆண்டவனுக்கு படைக்க அவனை ஆண்டவர் ஆசீர்வதிப்பதை இன்னொரு மகன் கவனிக்கிறான், முதல் முதலாக இன்னொரு பாவம் அரங்கேற்றப்படுகிறது தன் சகோதரன் மீது பொறாமை கொண்டு அவனை அங்கேயே வெட்டி கொலை செய்கிறான். முதன் முதலில் மனிதனின் ரத்தம் பூமியின் மீது பாவ செய்கையினால் விழுகிறது இவ்வாறு பாவம் பூமியில் தழைக்கிறது பாவத்தை போக்கும் நிவாரணியாக விலங்குகள் பறவைகள் முதலியவற்றின் ரத்தம் பலியிட ஆண்டவர் கட்டளையிடுகிறார் பாவங்களுக்கேற்ப பலிகள் நிர்ணயிக்கப்படுகிறது. யூதர்கள் அவ்வாறே விலங்குகளையும் பறவைகளையும் மேடைகளை கட்டி அதன் மீது பலியிட்டு தங்களது பாவத்தை நிவிர்த்தி செய்கின்றனர். ஆனாலும் யூதர்களின் பாவம் குறைவதாக இல்லை ஏனெனில் அவர்கள் இன்னும் அதிகமான பாவங்களை செய்து ஆண்டவரை கோபப்படுத்திக் கொண்டே இருந்தனர்.

ஆண்டவர் யூதர்களின் பாவத்தை களைய பல தீர்க்கதரிசிகளை அவர்களிடையே எழுப்புகிறார் ஆனாலும் பாவம் பெருகிக்கொண்டே போனது, கடைசியாக நோவா என்கின்ற ஒருவரைத் தவிர பாவம் செய்யாதவன் மற்றும் ஆண்டவரின் கட்டளைகளுக்கு கீழ்படியாதவன் ஒருவனும் இல்லை என்கின்ற நிலைமை உருவாகிறது, அப்போது நோவாவிடம் ஆண்டவர் பூமியை அழிக்கப்போகின்ற விவரத்தை கூறி அதற்க்கு முன் ஜனங்களுக்கு அதைப்பற்றி எடுத்துச் சொல்ல சொல்லுகின்றார், நோவா என்பவர் மக்களிடம் பூமி அழிக்கப்பட போகிறது ஏனென்றால் பாவம் பெருகிவிட்டது என்கின்ற செய்தியை சொல்லுகிறான், அதை நம்புவதற்கு ஒருவரும் தயாராக இல்லை, நோவாவிடம் ஆண்டவர் ஒரு பெரிய மதகை உருவாக்கச்சொல்லுகிறார். அதன்படி ஒரு பெரிய மதகை நோவா உருவாக்குகின்றார். அதில் நோவாவின் மகன்கள் மருமகள்கள் என நோவாவின் குடும்பத்துடன் ஊர்வன பறப்பன காட்டு மற்றும் நாட்டு மிருகங்களில் ஜோடி ஜோடியாக அடைக்கப்பட்ட பின்னர் பகல் இரவு என்று 30 நாட்கள் ஓயாத மழை பெய்து பூமி அழிக்கப்படுகின்றது.

பின்னர் உண்டான ஜனமும் தொடர்ந்து பாவத்தில் மூழ்க ஆரம்பித்தது, ஆண்டவர் இம்முறை தனது சொந்த மகனை பூமியின் மீது மனிதனாக பிறக்கச் செய்து அவருடைய பாவமற்ற ரத்தம் பூமியின் மீது விழச் செய்து பூமியில் படிந்துள்ள பாவத்தை போக்க பாவ நிவாரண பலியாக செய்கிறார். இயேசு கிறிஸ்த்துவை சிலுவையில் பாவிகளுடன் பாவியாக கொல்லப்பட்டு பாவம் நிவிர்த்தி செய்யப்படுவதே Good Friday. மனிதர்களின் நலத்துக்காக ஆண்டவன் தனது மகனை பலியாக செய்வதை நினைவு கூறும் தினம், முன் குறித்தபடி மூன்றாம் நாள் உயிர்த்து எழுந்து உலகில் பரிசுத்த ஆவியானவராக தனது கடமைகளை செய்து வருகிறார். ஆதாமில் தோன்றிய மரணத்தை சிலுவையின் மீது ஜெயித்தார் என்பதை நினைவு கூறும் நாள் ஈஸ்ட்டர் சண்டே என உலக முழுதும் கொண்டாடப்படுகிறது.



@@@@@@@@@@@@@@@

பதில்......கடிதம்

[ எனது கடிதத்திற்கு பதில் கடிதம்]


அன்புள்ள ..........

ஏறக்குறைய 31 வருடங்களுக்குப் பின்னர் உனது கடிதம் வாசித்தேன், கடிதம் கண்டவுடன் உலக அதிசயங்களில் ஏதோ ஒன்றை கண்டுவிட்ட உணர்வு ஏற்பட்டது, அதன் காரணத்தை நீ நன்கு அறிவாய், உன் நிலைமையை பற்றியும் உனது குடும்பத்தாரைப் பற்றிய நினைவே இல்லாமல் நான் தான் உனக்கு பலமுறை தொடர்ந்து கடிதம் எழுதி வந்தேன், எனது ஒரு கடிதத்திற்கும் பதில் கடிதம் எழுதும் வழக்கத்தை கடைசிவரையில் நீ ஏற்ப்படுத்திக் கொண்டதே இல்லை என்பது காலம் பல கடந்து வயது முதிர்ந்து போனாலும் எனக்கு மிகவும் நன்றாக நினைவு இருக்கின்றது. உனது முதல் கடிதத்தை இத்தனை ஆண்டுகள் கழித்து வாசித்தப் பின்னர் ஆச்சரியம் கலந்த ஏதோ ஒரு உணர்வில் உந்தப்பட்டு கடிதத்தை முழுவதையும் ஒரே மூச்சில் படிக்க இயலாமல் துக்கம் என் தொண்டையை வந்து அடைத்துக் கொண்டது.

நான் ஒரு துரோகி என்பதை அழகாய் எடுத்துகூறியதுடன் உன் எழுத்துக்களில் கூட உனது ஏமாற்றத்தின் விளிம்பை தொட்டது என்னை கூனி குறுகச் செய்துவிட்டது. எங்கேயோ கண் காணா இடத்தில் உன் பெற்றோருடன் நீ அமைதியாய் வாழ்ந்திருந்த போது காதல் சுனாமியை உன் இதயத்தில் ஏற்படுத்த காரணமாய் நான் இருந்தேன் என்பதும் பிறகு உன் இதயத்தின் அளவிட இயலாத துக்கத்திற்கு நான் மட்டுமே பொறுப்பு என்பதை எனக்கு நாசுக்காக சுட்டிக் காண்பித்து இருந்தாய். அதை நான் மறுக்கவில்லை, அதனால் தானோ என்னவோ எனது வாழ்வில் துன்பம் நிறைந்தே உள்ளது. இன்னும் இந்த நய வஞ்சகனை நினைவில் வைத்திருக்கின்றாயே அதற்க்கு எனது நன்றிகள். வாழ்க்கை என்பது யாருக்கும் அவரவர் விரும்பியப்படி கிடைபதில்லை என்பதை யாவரும் அறிவர். தோல்விகளும் காயங்களும் இல்லாமல் வாழ்க்கை கிடையாது என்பதை நீ அறிந்திருப்பாய். புதிதாக நான் என்ன சொல்லிவிடப் போகிறேன். காலம் கடந்துதான் பல விஷயங்கள் நமக்கு விளங்குகிறது. இதை விதியென்று சிலர் சொல்லுவர். ஆனால் எனக்கு விதியின் மீது நம்பிக்கை இல்லை, ஒன்று மட்டும் நான் நம்புகிறேன், ஒவ்வொருவர் வாழ்வில் நடக்கின்ற ஒவ்வொரு சிறிய பெரிய எல்லா சம்பவங்களும் நாம் பிறப்பதற்கு முன்பே அவரவர் பெயரில் அட்டவணை தயாரிக்கப்பட்டு விடுகிறது. அவற்றை யாராலும் எதற்காகவும் மாற்றம் செய்வது இயலாத ஒன்றாகி விடுகிறது.

நாம் வாழும் ஒவ்வொரு நிமிடமும் புதிதாக எதையாவது விளங்கிக் கொண்டே இருக்கிறோம், வாழ்க்கை மிகவும் சிறியது அதில் கிடைக்கின்ற பொழுதை வருந்தி கழிப்பது கூட நமக்கு முன் குறித்தவையே. அதனால் யார் மீதும் எதற்காகவும் வருத்தபடுவது அறியாமை. எஞ்சியுள்ள உன் வாழ்நாளில் குதூகலமாகவும் எல்லோரிடமும் அன்பாகவும் இருக்க முயன்று பார், நிச்சயம் வாழ்க்கைக்கு அர்த்தம் விளங்கும். என்னுடன் பகிர்ந்து கொள்வதற்கு ஏதேனும் செய்திகள் இருந்தால் மறக்காமல் கடிதம் எழுது, உன் மடல்களை எதிர் நோக்கும்.


அன்பு ..........



###########

கடி தாங்க முடியல

ஆறு மணிக்கு மேல் வீட்டிற்கு வருகிற விருந்தாளிகள் பொதுவாக திரும்பவும் உடனே போக மாட்டார்கள், அதனால் பல வீடுகளில் அவர்களை அழையா விருந்தாளி என்று கூட சொல்வதுண்டு. வீட்டினுள் படுக்கையறை முதல் எல்லா இடங்களையும் ஒன்று விடாமல் நுழைந்து சுற்றி விட்டு, கடைசியாகத்தான் படுக்கையறைபக்கம் நுழைவது இவர்கள் வேலை. வீட்டில் அனைவரும் எப்போது உறங்குவார்கள் எப்போது விளக்குகளை அணைப்பார்கள் என்று ஒதுங்கி இருந்து கவனித்துவிட்டு பின்னர் ஒவ்வொருவரையும் சத்தம் போடாமல் தொல்லை கொடுப்பது, இரவு நேரங்களில் செந்நீர் குடிக்கும் அரக்க கூட்டம்.

கடினப்பட்டு சேமித்து வைத்த சிவப்புயிரை இலவசமாய் வன்முறையில் பிடுங்கிக் கொள்ளும் அசாதாரணமான அரக்கன் இவன், அரக்கர்கள் ஒன்று கூடி ஒரு பெரிய முடிவெடுத்தனர், இனி தங்களுக்கு பெரிய வலுவான உடலமைப்பு வேண்டாம், சிறிய உடலமைப்பு போதும் மானுடப்பிறவிகளை ஒரு வழி செய்து விடுவோம் என்பதுதான் அவர்கள் எடுத்துக்கொண்ட மிக புத்திசாலியான முடிவு. இத்துனூண்டு ஜன்மம் எடுத்துக்கொண்டாலும் அவர்கள் அரக்கர்கள் என்பதால் செந்நீர் அருந்தவே அதிகப்பிரியம். வெறும் செந்நீரை மட்டும் அருந்தி விட்டு போனால் போதாது என்று தங்களை விட மிகச் சிறிய, மனித கண்களுக்கு புலப்படாத, மனிதர்களை துன்புறுத்தும் மற்ற கிருமிகளையும் துணைக்கழைத்து கொள்வது என ஓர் உடன்பாடும் ஏற்படுத்தி கொண்டது அந்த மனித செந்நீர் பருகும் அரக்க கூட்டம்,

மனிதர்கள் எத்தனையோ வகையில் அவைகளுடன் போராடி கோடி கணக்கில் அவைகளை தினம் தினம் அழித்தாலும் அவை மீண்டும் மீண்டும் கோடிக் கணக்கில் உற்பத்தியாகும் வரம் வாங்கி கொண்டனவாம். முன் பிறவிகளில் அரசியல்வாதிகளாய் வாழ்ந்து தங்களது சொந்த விருப்பு வெறுப்புகளை வெளிபடுத்த இயலாமல் போன பல மனிதர்களும், உணவில் கலப்படம், பாலில் தண்ணீர் கலந்து பணம் ஈட்டி பின்னர் உயிர் நீத்த மனிதர்களும், பணம் வாங்கிக்கொண்டு மனிதர்களின் கை கால் கழுத்து வயிறு போன்றவற்றை வெட்டி பின்னர் காவல்துறையால் என்கவுண்டர் செய்து கொல்லப்பட்ட சமூக விரோதிகளும், ஆறு மணியாகிவிட்டால் குடிக்காமல் வாழ இயலாமல் இறந்து போனவர்களும், இப்படிப்பலரும் செந்நீர் குடிக்க இந்த அரக்க கூட்டத்தில் அரக்கர்களுடன் இணைந்து செயலாற்றி வருவதாகவும் அறிய முடிந்தது.

எவரது வீட்டுக்குள் நுழைவதற்கும் விருந்தாளியாக, அல்லது சொந்தகாரராக இருக்க வேண்டிய அவசியமே இல்லை என நினைக்கும் இந்த அரக்க கும்பலுக்கு, மாளிகை குடிசை என்கின்ற பாகுபாடெல்லாம் கிடையாது, செந்நீர் மட்டும் அருந்தியே ஆகவேண்டும், இந்த பாழைப்போன கொசு இருக்கிறதே இவைகளைத்தான் சொன்னேன். அரசியல்வாதியின் 'கடி'யாவது தேர்தல் முடிந்து அதன் முடிவுகள் தெரியும்வரை தான், ஆனால் இந்த பாழாய்ப்போன கொசுக்களுக்கு ஓய்வு என்பதே கிடையாது. அப்பப்பா என்ன கடி என்ன கடி.


()()()()()()()()()()()()()()()()()()